અંકલેશ્વર જીઆઇડીસી ના  ગણેશ સ્કવેર માં આવેલી એક કપડાની દુકાનમાં અચાનક આગ ફાટી નીકળતા દોડધામ મચી ગઈ હતી. ચાર ફાયર ફાયટરોએ ભારે જહેમત બાદ આગ પર કાબુ મેળવ્યો હતો.

અંકલેશ્વર જીઆઇડીસી રહેણાંક વિસ્તાર માં આવેલ ગણેશ સ્કવેર ખાતે ‘જય અંબે કલેક્શન’ નામની આ દુકાનમાં લાગેલી આગે જોતજોતામાં વિકરાળ સ્વરૂપ ધારણ કર્યું હતું. આગને કારણે ધુમાડાના ગોટેગોટા દૂરથી દેખાઈ રહ્યા હતા. ઘટનાની જાણ થતાં જ અંકલેશ્વર ડીપીએમસી ના ચાર ફાયર ફાઈટર તાત્કાલિક સ્થળ પર પહોંચ્યા હતા અને આગને વધુ ફેલાતો અટકાવી હતી. પ્રાથમિક અનુમાન મુજબ, શોર્ટ સર્કિટના કારણે આગ લાગી હોવાનું મનાય છે. સદનસીબે આ ઘટનામાં કોઈ જાનહાનિ થઈ ન હતી, પરંતુ દુકાનનો સંપૂર્ણ સામાન બળીને ખાખ થઈ ગયો હતો.